ČAKAVSKA RIČ – M.B. Dobrila: “Verši”. In memoriam Magda Matošić…

In memoriam

Magda Matošić

(1928 – 2021.)

 

 

 

 

Sveti Duje pomozi

 

Šjor Vinko

sramuje se nosit cviče

utira ga je u lumbrelu

i bogava

ma udrila nevera

smočila ga

do mudanat

ni se đava da otvorit

za potribe

poton je ariva doma

žena ga isovala

zlamenovala se

prisila jon fešta

o cviča

i matrimonja

 

 

 

Znate ča ču van reč

 

Na Bačvice

kuridu dičica

cilu miju

more je najpri do gujc

poton do paze

nima straja

ma se mlaci razbolidu

o teplote

i juske potribe

ni pametno ič š njiman tote

nikako

 

 

 

Kako ste još

 

Za nač se ovod ka mi

triba jubit siku

vonje o mora murtilu žalo

jemat dil Merjana

za vatat

u sakreto guštat

largo o furešti

muzuvira

 

 

 

Znan

 

Bobiči

su najlipje delicje

o fjere

 

 

 

Škužajte

 

Imbrojat čovika

šerjasto

grij je

berekinada

šekonda je fjaba

 

 

 

Tuji posli

 

Laumbarda cukun

prikomiščan se

s noge na nogu

iščen uru

za poč ča

 

 

 

A bome lipo

 

Napirlitala se ka kurba

ma su jon fiščali ispripadali je

pari mi se da višje

ni kuri ti kombinacjun

ovod su sotone o muškič

kad ni mire

 

 

 

Edukacjun

 

Sve se more sorit

uvridit čovik

fameja

ma se ne smi taknit u Mater

ni za igrat se

ni za zaudobit

 

 

 

Čale moj

 

Barenko jedan put na dan

triba reč

bila me voja pa ča je

 

 

 

Vižita

 

U Varoš

čuti se vonj

o murtile po balaturan

dvori se bilidu o robe

obišene po konopin

tiramolin

i ponistran

su drvenin ščapin

mirin skalinade

treso krove

kantune kontrade

ščipjen fjabe iz sičanja